नवी मुंबई विमानतळाला दि.बा. पाटील यांचे नाव निश्चित; पंतप्रधान मोदींचा सकारात्मक सल्ला – मुख्यमंत्री फडणवीस..

TIN24

मुंबई, दि. ३: नवी मुंबई आंतरराष्ट्रीय विमानतळाला लोकनेते दि.बा. पाटील यांचे नाव देण्याचा राज्य सरकारचा निर्णय अटळ असून, या प्रस्तावाला पंतप्रधान नरेंद्र मोदी यांनी सकारात्मक प्रतिसाद दिला आहे. या व्यतिरिक्त, पुणे आणि छत्रपती संभाजीनगर येथील विमानतळांच्या नामविस्तारासाठीही लवकरच केंद्राकडून मंजुरी मिळणार असल्याचे मुख्यमंत्री देवेंद्र फडणवीस यांनी जाहीर केले.
विमानतळ नामकरणाबाबत बोलताना मुख्यमंत्री फडणवीस म्हणाले, “राज्य सरकारने केंद्राकडे पाठवलेल्या प्रस्तावानुसारच हे नामकरण होईल.

पूर्वी ‘नवी मुंबई आंतरराष्ट्रीय विमानतळ’ असे नाव मंजूर झाले असले तरी आता त्यात नामविस्तार होऊन ‘लोकनेते दि.बा. पाटील नवी मुंबई आंतरराष्ट्रीय विमानतळ’ असे होईल.” पंतप्रधान मोदींशी झालेल्या भेटीत या प्रस्तावाला त्यांचा पूर्ण पाठिंबा मिळाला असून, नवीन धोरणानुसार हे प्रक्रिया पूर्ण होईल.

विमानतळावर प्रवासी वाहतूक सुरू होण्यापूर्वी ‘ड्राय रन’ चालू असून, यात तांत्रिक तयारी आणि बुकिंग प्रक्रिया सुरू आहे. येत्या काळात अधिकृत उद्घाटनात हे नाव जाहीर होईल. विधिमंडळाच्या दोन्ही सभागृहांनी या नामकरणाचा ठराव संमत केला असून, मंत्रिमंडळानेही याला मंजुरी दिली आहे.

पुणे आणि छत्रपती संभाजीनगर विमानतळांचा नामविस्तारही लवकरच
नवी मुंबई व्यतिरिक्त, पुणे विमानतळाला जगद्गुरु संत तुकाराम महाराज यांचे नाव आणि छत्रपती संभाजीनगर विमानतळाला छत्रपती संभाजी महाराज यांचे नाव देण्याचा प्रस्ताव केंद्राकडे पाठवण्यात आला आहे. हे तिन्ही प्रस्ताव विचाराधीन असून, इतर राज्यांच्या प्रस्तावांसह नवीन धोरणानुसार मंजुरी मिळेल.

आंदोलनकर्त्यांवरील गुन्हे मागे घेण्याचे निर्देश
नामकरणासाठी आंदोलन करणाऱ्या कार्यकर्त्यांवरील गुन्हे मागे घेण्यात येतील, असे मुख्यमंत्री फडणवीस यांनी सांगितले. हे गुन्हे रद्द झाल्याने विमानतळावर नोकरी मिळण्यात अडचण येणार नाही. कोविड काळातील आंदोलनांमुळे दाखल झालेले गुन्हे न्यायालयाच्या परवानगीने मागे घेण्यात येतील.

यावेळी वनमंत्री गणेश नाईक यांनी प्रास्ताविक केले. आमदार रवींद्र चव्हाण, दशरथ पाटील, माजी खासदार कपिल पाटील, खासदार सुरेश म्हात्रे, आमदार प्रशांत ठाकूर, आमदार मंदा म्हात्रे, माजी खासदार रामशेठ ठाकूर यांच्यासह इतर लोकप्रतिनिधींनी भूमिका मांडली. आमदार महेश बालदी, माजी खासदार संजय पाटील, संजीव नाईक, जगन्नाथ पाटील आदी उपस्थित होते. सर्वपक्षीय समितीने मुख्यमंत्री फडणवीस यांना निवेदन सादर केले.

Author: The India News 24

TIN24 (The India News 24) The India News 24 (TIN24) is a Mumbai-based news Digital Media focusing on breaking news, local and regional issues in India, with content primarily in Marathi. It was established with an X (Twitter) presence since July 2022. Owner & News Editor: Amit Alhat Education: BA in Mass Communication Journalism (Graduate) Experience: 12 years in journalism Platforms: - Website: https://theindianews24.in - X (Twitter): https://x.com/the_indianews24 - YouTube: https://www.youtube.com/@theindianews247 - Instagram: https://www.instagram.com/theindianews_24